ҚМҚК «Принтмедиа технологиялар колледжінде» «Басудан кейінгі үрдістер» бөлімі бойынша апталық ұйымдастырылды.

Аталған шараға Зағип және нашар көретін азаматтарға арналған республикалық кітапханасының директоры Асхат Құсайыннұлы, кеңесшісі Лаззат Серікқызы және «Сөйлейтін» және Брайль кітаптарын шығару» бөлімінің меңгерушісі Болатхан Тұрарханұлы арнайы шақырылып, қатысушылармен өз тәжірибелерімен бөлісті. Олар зағип және нашар көретін азаматтарға арналған Брайль кітаптарын шығару үдерісі, бұл бағыттағы жаңашыл технологиялар және алдағы жоспарлар туралы айтып өтті.

Шара барысында «Брендинг – маркетингтік стратегия құралы» тақырыбында баяндама қорғалды. Сонымен қатар, «Арнайы білім беру қажеттіліктері бар адамдарға арналған өнімдерді жасау технологиясы» туралы да айтылып, инклюзивті білім беру мен арнайы баспа өнімдерін әзірлеу мәселелері талқыланды.

Апталық аясында колледж бен Зағип және нашар көретін азаматтарға арналған республикалық кітапхана арасында ынтымақтастық орнату мақсатында екіжақты меморандумға қол қойылды. Құжатқа колледж директорының міндетін атқарушы Г.А. Абдуллаева мен кітапхана директоры А.К. Байузаков қол қойып, алдағы уақытта өзара серіктестікті дамытуға ниетті екендерін білдірді.

Шара соңында Зағип және нашар көретін азаматтарға арналған республикалық кітапхана өкілдері колледжге Қазақстан Республикасы Конституциясының 30 жылдығына орай нүктелі-бедерлі қаріпте басылып шыққан ҚР Конституциясы кітабын тарту етті.